நிரபராதிக்கு சிறை தண்டனை! குற்றவாளிக்கு பாதுகாப்பு!! நீதியின் விலை?

அல்லாஹ்வின் திருப்பெயரால்..

ஒரு குற்றத்தை செய்தவர் தலை மறைவாகிவிட்டால் அவரை பிடிக்க போலீசார் தனிப்படை அமைப்பார்கள், வலைவீசி தேடுவார்கள். ஆனால் அதற்கு மாறாக அவர் மேலும் குற்றம் செய்யும் விதம் போலீசார் அவருக்கு பந்தோபஸ்து வழங்குவதை கேள்விபட்டிருக்கிறீர்களா ! இன்றைய தமிழக அரசும் காவல்துறையும் அதைத்தான் செய்துகொண்டிருக்கின்றன.

கொலைமிரட்டல் உட்பட உள்ள பல வழக்குகள் நிலுவையிலிருக்கும் போது பி.ஜே.பி.யின் உமாபாரதி தமிழகத்திற்கு வந்து சென்றிருக்கிறார். அரெஸ்ட் வாரண்டை கையில் வைத்துக்கொண்டிருக்கும் காவல்துறை, அவரை கைது செய்யாமல் வேடிக்கை பார்த்திருக்கிறது. அதுமட்டுமல்லாமல் அவருக்கு பந்தோபஸ்தும் வழங்கியிருக்கிறது. இது தான் நம் நாட்டு நீதிதுறையின அவலநிலை. தமிழகத்திற்கு வந்து சென்றதோடு மட்டுமல்லாமல் சென்னையில் பத்திரிகையாளர்களுக்கு மத்தியில் பேசும்போது 'என்ன நடந்தாலும் ராமர்பாலத்தை பாதுகாப்போம், முடியுமானால் தன்னை கைது பண்ணுங்கள் பார்க்கலாம்' என்று தமிழக அரசிற்கு சவால் விட்டுள்ளார். அரசுக்கு சவால் விட்டு சட்டம் ஒழுங்கு பிரச்சனையை ஏற்படுத்தும் அவரை கைது செய்ய முடியாத இந்த கையாலாகாத அரசு வாயில் விரலை வைத்து வேடிக்கை பார்த்திருக்கிறது.

கடந்த மாதம் ராமேஸ்வரத்தில் நடந்த பொதுக்கூட்டத்தில் மத நல்லிணக்கத்தை கெடுக்கும் விதத்தில் பேசியதற்காகவும் அரசு அதிகாரிகளை கொன்று விடுவதாக கொலை மிரட்டல் விடுத்ததற்காகவும் அவருக்கு எதிராக வழக்கு பதிவு செய்யப்பட்டு அரெஸ்ட் வாரண்டும் பிறப்பிக்கப்பட்டுள்ளது. போலீசார் அவரை ரோந்து செல்லும் போது பிடிக்க தேவையில்லை, வலை வீச வேண்டியதில்லை, தனிப்படை அமைக்க வேண்டியதுமில்லை.கண்ணுக்கு முன்பாக நிற்கிறார். தமிழகத்திற்கே வந்த அவரை காவல்துறை கைது செய்யாமல் விட்டிருக்கிறது. ஆனால் எந்த குற்றமும் செய்யாத மதானிக்கு 9 வருடம் சிறைத்தண்டனை வழங்கியிருக்கிறது. இதற்கு நீதித்துறையும் காவல்துறையும் என்ன பதில் சொல்லப்போகிறது.

-முஹம்மது மாஹீன்