சேது ராமன் ' திட்டம் என பெயர் வைக்கவும் தயார் : கருணாநிதி

சேது சமுத்திர திட்டத்தை நிறைவேற்ற அத்திட்டத்திற்கு ' சேது ராமன் ' திட்டம் பெயர் வைக்கவும் தயார் என தமிழக முதலமைச்சர் கருணாநிதி கூறியுள்ளார்.

தமிழக சட்டசபையில் இன்று இது தொடர்பாக அவர் பேசுகையில் கூறியதாவது : சேது சமுத்திர திட்டத்தை வேண்டுமென்று சொன்னவர்கள், இப்போது வேண்டாமென்கிறார்கள்.

மத்தியில் இருக்கும் காங்கிரஸ் அரசும், திமுக அரசும் இணைந்து இந்த பெயரை பெற்று விட்டுவிடக்கூடாது என்பதற்காக இந்த திட்டத்தை சீர்குலைக்க, தேவையில்லாமல் ராமரை பிடித்து இழுக்கிறார்கள்.

ஏதோ ராமர் என்றால் எனக்கோ அல்லது பேராசிரியருக்கோ பிடிக்காது என்பதுபோல்.

அண்மையில் விழா ஒன்றிலே கூட நண்பர் ரஜினிகாந்த் பேசும்போது, ராமரை உங்களுக்கு பிடிக்காது என்று ஊரெல்லாம் பிரச்சாரம் செய்கிறார்கள் என்று சொன்னார்.அதற்கு நான் சொன்னேன், அப்படியெல்லாம் ராமர் மீது எங்களுக்கு விரோதம் கிடையாது என்று அவர்களிடத்திலே சொல்லுங்கள் என்று.

வேண்டுமானால் ' சேது ராமன் ' திட்டம் என்றே கூட பெயர் வைத்துக் கொள்ளுங்கள்.எங்களுக்கு வேண்டியது திட்டம்.எங்களுக்கு வேண்டியது அந்த வழி ; அந்த வாய்க்கால்.எங்களுக்கு வேண்டியது தமிழ் நாட்டின் வளம்.

அதற்காகத்தான் இந்த திட்டங்களை நாங்கள் நிறைவேற்ற சொல்கிறோமே தவிர, ஏதோ வீண் பிடிவாதத்திற்காக, ராமனை இழிவுபடுத்த வேண்டுமென்பதற்காக யாரும் இதை சொல்லவில்லை.

இந்த அரசு யாரையும் புண்படுத்த வேண்டுமென்று விரும்புகின்ற அரசல்ல.

இவ்வாறு அவர் கூறினார்.

(எது எப்படியோ சேது சமுத்திர திட்டத்தை நிறைவேற்றி முடிப்பதற்க்குள் இன்னும் என்ன என்ன கூத்து நடக்க போகிறதோ...)